«Азвесь уйе вордӥськем кырӟан»

Чебер нимо мероприятие «Эзысь войын чужис сьылан» («Песня рождённая в ночь серебра») туннэ ортчиз коми культура центырын. Та тунсыко проект куатетӥзэ ортче ни. Проект сӥземын авторской коми кырӟанъёслы, кудъёсыз пӧртэм вакытъёсы туж популярной луизы, но али ке но ӧз ыштэ тунсыклыксэс туала эстрадаын но калык пӧлын.  Таяз проектын тодматскон ортчиз куинь коми кырӟанъёсын: «Вöлi шоныд гажа тулыс» (Биа Öгыр (Яков Чупров)), «Тöдса пилот» (Василий Власов), «Коми танго» (Василий Чувьюров).

Вераськизы кырӟанлэн авторъёссы сярысь: соослэн сямзы, тунсыкъяськемъёссы, улонзы сярысь. Кӧня ке видеороликъёс возьматэмын вал. Кырӟанъёслэн кылдэмзы но калык пӧлын улонзы сярысь тунсыко малпанъёсынызы люкиськизы мероприятие лыктэм муртъёс. Котькуд мурт вераз кырӟанэн тодматскемез, мылкыдъёсыз сярысь. Куд-огез кырӟаз но.
Татын ик кырӟанъёсты кырӟазы туала егит артистъёс. Аспӧртэмлыко но туж тунсыко вал кылзыны, макем воштӥське но туала улонлы тупатске кемаласен тодмо кырӟан.

                                                                           ***

Мон малпамъя, таӵе проект туж тунсыко луэ. Таӵе проектын тодматскыны луэ кырӟанлэн автръёсыныз но пӧртэм вакытъёсы кырӟанэз кырӟасьёсын. Озьы ик кырӟанъёсты тодӥсьтэм егит калыкъёслы умойгес амал луоз тодматскыны удмурт яке коми кырӟанъёсын. Туж умой луысал, та выллем проект Удмуртиын но ортчылысалыз ке. Кылсярысь, туж тунсыко тодматскыны «Ой, тӥ чебер нылъёс» кырӟанэн но солэн авторъёсыныз, кудӥз туж популярной удмуртъёс пӧлын. Со сяна мукет калыкъёслэсь но сюлэмъёссэс вырӟытӥз. Кырӟанлэн вордсконэз но историез, манам малпамея, туж тунсыко котькуд адямилы. Азьланяз, малпасько, таӵе ӝытэз ортчытон бордын кулэ малпаськыны милемлы но – удмуртъёслы! Асьме удмурт эстрада паськыт но узыр, соин трос тунсыко кырӟанъёсмы но вань, кудъёсыныз тунсыко луысал тодматскон ӝытъёс ортчытыны. Адӟем кароно коми бӧлякъёсмылэсь. J

Та борды басьтӥськыны быгатысалзы УМОО «Шунды»-ысь егит удмуртъёс. Удмурт эшъёс, кызьы малпаськоды? Тунсыко проект луыны кулэ ук?