«Вордӥськем Выль Тӥгырмен гуртэ толон, туннэ но ӵуказе!»: данъяськон но кайгырон.

Удмурт Элькунлэн лымшор палаз Кияса ёрос интыяськемын. Та ёрослэн тужгес но шулдыр интыяз пуксемын Выль Тӥгырмен (Дубровский) гурт. Котыраз сяськаё возьёс, узыё-борыё гурезь бамалъёс, нюлэсъёс, паськытэсь шепаськись бусыос…

Нош ку-о меда кылдэм та чебер гурт? Выль Тӥгырменлэн кылдэмез сярысь вань туж чебер мадёс. Та мадёсэз пересьёсмы вашкала дырысен пельысь-пеле, ымысь-ыме возьыса, асьме вакытозь вуттӥзы. Тазьы кутско вал мадьыны пересьёсмы вашкала мадёссэс:

Вукогурезь йылысен

«Вашкала вакытъёсы со вал. Вужгуртӥсь[1]  куинь удмурт воргоронъёс умой музъем утчаны потӥллям. Нырысь ик соос вуиллям Лутокине[2], собере – Мало Киясовое[3], отӥсен Эльдыбай[4] бусыетӥ Миёл шур дуре васькиллям. Кема мыныса-мыныса, соос жадизы, ялкарыны[5] пуксизы. Котырак учкизы но – котыр дуннелы паймизы. Татын кадь, нокытын но таӵе ӝужытэсь, юнэсь но трос тыпыос ӧвӧл, дыр. Нош возь кыӵе шулдыр! Кема синмаськыса учкиз Эркемей нимо пиосмурт та инкуазь шоры. Пумен ӝыт но вуиз. Воргоронъёс изьыны выдӥзы. Ӵукна султыса, Миёл шур доры пыласькыны васькизы. Кытӥсь ке но шур кузя вӧлдӥськыса, атас чоръям куара кылӥськиз. Воргоронъёс, кытын ке гурт вань шуыса, туж шумпотӥзы. Со куара пала дырттӥзы.

Эркемей огназ та интые кылиз, нош кыкез эшъёсыз макем паймизы, куке берен  Вуж Тӥгырменэ вуизы…

Вашкала дырӥсен ини адями вулы матэ интыяське. Эркемей агай но аслыз корка пуктэм ошмесысь васькись пичи гинэ шур дуре. Табере со пичи шурез Эркемей шур шуиськомы ни. Татын со аслэсьтыз юн выжызэ лэзиз. Озьы кылдӥз Выль Тӥгырмен гурт».

Выль Тӥгырмен гуртэз вить пӧртэм нимало. Та гурт Выль Тӥгырмен, Дубровский, Бламбей, Гребени, Починка нимъёсыныз тодмо луэ на. Нош та ласянь пересьёсмы тазьы веразы:

Изгурезь йылысен

«Вужгуртын¹ бай бигер пиосмурт улэ вылэм. Одӥг пол, пе, кыччы ке мыныкуз солэсь юаллям, кыччы мынӥськод шуыса. Со тэгерманэ мынӥсько шуэм. Бигер сямен тэгерман – со вуко шуэм луэ. Удмуртъёс ас сяменызы валаллям та кылэз но Вужгуртэз со дырӥсен Тӥгырмен ниманы кучкиллям. Нош та гуртмы Вуж Тӥгырменӥсь яна потыса кылдэмын бере, та гуртмес но Виль Тӥгырмен ниманы кучкиллям инь.

Кыкетӥ нимыз гуртмылэн Дубровский. Таӵе ним сётӥллям гуртмы котырись азьвыл аръёсы трос тыпыос будэмен. Азьло, пе, туж трос тыпыос будо вылэм, нош берло ини соосты кораса быдтӥзы.

Нош бигеръёс гуртмес воксё но Бламбей шуо. Вашкала дыръёсы ведь нюлэсъёс но пӧйшуроесь вал. Гурт котырись нюлэсъёсамы бигеръёс, пе, ӵем пӧйшурало вылэм. Та нюлэсъёсын койыкъёс трос улӥллям. Нош койыкез бигеръёс бламб шуо. Тани та бордӥсь кылдӥз гуртмылэн таиз нимыз.

Гребени, бон, ӟучъёс шуо ини. Гуртӥсь урамъёсмы йырсынлы кельшо, пе. Соин тӥни ӟучъёс гуртмес Гребени шуо.
Починка, бон, вужгуртъёс шуо гуртмес. Асьме гурт Вужгуртӥсь яна потыса пуксемын бере.
Вот сыӵе тӥни гуртмы нимъёслы бай».

Та тополь во:зын азьвыл быдз:ым куала вылэм.

Та удмурт гурт туж ик бадӟым ӧвӧл, огъя куать урамъем. Нырысетӥез урам кылдэмын татчы Эркемей интыяськыку. Та пумысен пӧртэм веранъёс вань. Кин ке шуэ 1826 арын кылдэмын, нош кин ке  - 1828 арын. Та урамез гуртоос Кузь урам яке Ваннапал шуо. Официальной нимыз – улица Советская. Мукетыз  урам 1908 арын кылдэм –  Сидор урам[6]. Нырысь ик та ураме аслыз корка пуктэм Эльдыбайысь⁴ лыктэм ӟуч узыр воргорон – Шадрин Никанор. Нош Пислег урамлэн[7] кылдэмез герӟаськемын Прошка нимо воргоронэн. 1928 арын со татчы пуктэм аслыз юрт. Али чебересь коркаос синмез туж шумпотто. 1930 арын кылдӥз Пекеля урам. Нырысетӥ вамышсэ татчы Огафья апай лэсьтэм. Кема аръёс ӵоже Пекеля ураммы пал дур улэм. Буш палаз пилорама, курег гид, кебить, мастерской интыяськиллям. Быдӟым атыкай ож бере Пислег Ладимер (Атеев Владимир) улыны потэм та ураме. Со возы мукетъёсыз семьяос интыяськиллям. Озьы кылдӥз урамлэн 2 чурез. Та урамез ӟуч сямен Лесная шуо (Нюлэслы матын интыяськеменыз). 1956 арын кылдӥз Виль урам[8]. 1999 арын Гараж урам[9]. Азьло та урамез Вова урам шуо вал, малы ке шуоно нырысьсэ татчы улыны потӥз вал Вова нимо егит воргорон. Нош али та урамез Беспалов шуыса нимазы. Гуртысьтымы Беспалов Вениамин Тимофеевичлы сӥзьыса. Службазэ Афган музъем вылын нуиз. Отын туж зол сӧсырмыса бырыны шедиз.  Кулэм бераз пусъемын вал горд кизили орденэн. Беспалов В.Т. ватэмын та гуртын ик.

Зор бере

Таӵе тани Выль Тӥгырмен. Гурт пичи ке но, гурт калык татын сюлмо, ужась, кырӟась но капчи мылкыдо. Котькыӵе ужез дэмен быдэсто. Нош Выль Тӥгырмен но гурт  котырысь инкуазь чебереныз но йӧно калыкеныз лыктэм куноосты паймытэмысь али ке но уг дугдо.

***

Пичи гинэ Тӥгырмен гуртмы, нош кӧня сое данъязы асьсэлэн кылбуръёсазы гуртысьтымы кылбурчиос – Геннадий Михайлович Камашев «Мынам шудбуре» кылбур бичетаз, дырызлэсь вазь улонысь кошкем Алена Игоревна Никонова, Валентина Геннадьевна Куликова аслаз кылбуръёсаз. Нош Николай Анисимовлэн кылбуръёсыз «Ненаглядная сторона» кылбур бичетэ пыртэмын. Соослэсь аӟдем каро егит кылбурчиосмы – Шапеева Ольга, Анисимова Татьяна.

Маскара-каскара футбол

Гуртысьтымы потӥзы трос дано но тодмо адямиос. Ми данъяськиськом «Италмас» ансамбльысь Людмила Михайловна Камашеваен, Удмурт кун университетысь дышетӥсен Дмитрий Анатольевич Ефремовен, культура удысын ужась кузпалъёсын Никоновъёсын, кудъёсыз али Кияса черкогуртын уло, Владимир Геннадьевич Куликовен, кудӥз арганэн шудыны кутске ке, пиналэз но, пересез но эктытэк уг чида, Светлана Артемьевна Замятинаен, кудӥзлы «Почётный гражданин Алнашского района», «Заслуженный работник сельского хозяйства» дано ним сётэмын но мукет трос дано муртъёсын.

Нош али вордӥськем сэреге бертӥськод ке, гуртэ пырыку ик мылкыд куашка ни, син шоры куашкам ферма но склад юртъёс усьыку. Гуртын трос кузётэм буш юртъёс мӧзмыса сыло ни. Урамъёстӥ ортчыку азьвыл кадь пиналъёлэсь куараоссэс уд кылы ни. Котькуд корка вӧзтӥ ортчыкум тодам вайисько кузезэ, кыӵе сямо вал, кыӵе юртъер котырзэ чакла вал, чебер, чылкыт карыны тырше. Нош али…шим-шим…коркаос пересьмем муртъёс кадь нырзэс музэ ошыса, лулӟыло кадь потэ…жаль пото…сюлмы вӧсь луэ. Ма, калык но ӧжыт ни гуртын, трослы кулэсмиз улос. Тросэз егитъёс кошкизы каръёсы, тросэз пересьмыса кулӥзы, нош тужгес но шимесэз но кайгуоезгес – трос сӥле-виро воргоронъёс асьсэды асьсэос быдтӥзы. Оз! Соос юисьёс ӧй вал, гурт калык пӧлын ӟеч сямынызы но ужъёсынызы данъясько вал…МАЛЫ ОЗЬЫ ЛУИЗ? Тае асьсэос гинэ тодо ни. Улэ но улэ вал!…

Ачим но куддыр малпасько, тани мон но туж шумпотыса бертысал вордӥськем гуртам, анай-атай сямен тыршысал. Нош ку малпаськод, тон кенӝем тылы кадь татын ӝог бырод шуыса … нош умой уг луы пушкын. Кытчы питыра Дунне!? Огдырлы гуртэ бертылыку но тыршисько мургес шоканы та омырен, тросгес ӟюзьыны юзмыт ошмес вуэз, ортчыны пичи дыръя шудэм интыостӥ, выльысь но выльысь кырмасько улонысь кемаласен кошкем пересь нэнэелэсь керттэм чулкаоссэ, пӧзьыоссэ... КӦТ УГ ТЫРЫ!!! Сюлэм вирен пазяське, лул шузимымон йыгаське…кайгу пушкез тыре! Вордӥськем гуртэ, эн быр! эн безды дуннелэн чибориё шортдэремаз! Эн люк монэ выжыелэсь!

---

[1] Вужгурт – тазьы нимало Выль Тӥгырмен гуртын улӥсь гуртоос Вуж Тӥгырмен (Калашур – ӟуч сямен (официальной нимыз)) гуртэз, кудӥз та гуртлэсь куинь иськемын гинэ интыяськемын.

[2] Лутокинь – тазьы удмуртъёс ӟуч Лутоха гуртэз нимало.

[3] Мало Киясово – гурт ним.

[4] Эльдыбай - тазьы удмуртъёс ӟуч Ильдибаево гуртэз нимало.

[5] ялкарыны – литер. «шутэтскыны».

[6] Сидор урам – официально улица Красная

[7] Пислег урам - официально улица Центральная

[8] Виль урам - официально улица Гагарина

[9] Гараж урам - официально улица Беспалова