Удмурт но финн Комиысь дышетсконниосын: кусыпъёс но выль инвисъёс.

24-тӥ шуркынмонэ Сыктывкарысь искусствоясъя гимназиын туала финн-угор дунне  сярысь урок ортчиз. Та урокын Финнляндиен, финн егитъёслэн «Sukukansojen Ystävät» (Ӵыжы-выжы калыкъёслэн эшъёссы) огазеяськонзылэн ужъёсынызы но ужпумъёсынызы дышетскисьёсты тодматӥз Niko Partanen. Нош Удмуртиен, удмурт культураен, шаерысь тунсыко проектъёсын но удмурт егитъёслэн мерлыко  «Шунды» огазеяськонзылэн ужъёсыныз тодматӥ мон – Николай Анисимов.

Та сяна егитъёсын вераськон поттӥм коми кылэз но лулчеберетэз утён амалъёс сярысь. Никоен ӵош дышетскисьёсын огъя малпаськонъёсынымы люкиськимы; кылзыны сётим серемес аудиоверосъёсты коми но удмурт кылын. Нылпиослы тунсыко потӥз, таӵе амал пыр кыл но лулчеберет азинскыны но вӧлмыны быгатэ шуыса.

Урокын пукизы на дышетӥсьёс, кудъёсыз кенешонамы ӟеч пыриськизы, сюлэмшугъяськонъёссэс шараязы. Веразы, кыӵе мероприятиос ортчытӥсько соослэн гимназиязы коми кылэз утён но вӧлмытон понна.

Мон уроке лыктӥ удмурт калык дӥсен, кырӟай удмурт кырӟан, нош Нико финн кылын кылбур лыдӟиз. Тазьы нылпиос зэмос кылӥзы удмурт но финн кылъёсты.

Бӧрысь урокмес йылпумъям удмурт шудонъёсын. Шудӥзы дышетскисьёс но, дышетӥсьёс но. Шудонъёс пыр егитъёс тодматскизы удмурт калык шудонъёсын, эктонъёсын но гуръёсын. Нылпиос дышетӥсьёсынызы ӵош зэмос азартэ пыризы.

Огъя вераса, таиз пумиськонмы пайдалыко ортчиз нылпиослы, дышетӥсьёслы но милемлы – палэнысь, комиослы ӵыжы-выжы луись, студентъёслы. Пусйыны кулэ, та урок ортчиз коми кылын вераськыса.

***

Пумаз ватсаме потэ, Комиысь школаосын таӵе пумиськон милям нырысетӥез ӧвӧл ни шуыса. Таӵе пумиськонъёс но нылпиосын кенешон котькудмылы уно тунсыко выль иворъёс вуттэ, куд-ог ужпумъёс шоры зэмос синмынгес учкыны амал сётэ. Дышетскисьёслэн финн-угор калыкъёслы, лулчеберетлы но кылъёслы тунсыкъяськон но утьыны тыршон мылкыдзы юнгес пуроме.

Милям малпаммыя, таӵе пумиськонъёсты но кенешонъёсты ӵемгес ортчытъяны кулэ вылэм, озьы ик ӟечгес кусып радъяны мукет улосвылъёсысь национальной дышетсконниосын. Валамон, матысь тодматсконэз радъян  понна трос шугсекытъёс луозы, со понна, мон малпасько, ӟеч луысал вотэсын (интернетын) кусып тупатыны. Тунсыко аспӧртэмлыко «вотэс выж» проект радъяны, куке дышетӥсьёслэн но дышетськисьёслэн амалзы луысал ог-огенызы кенешон ортчытыны но мукет. Ваньмыз та быдэстымон, кӧня ке гинэ тыршыны но кусып радъяны гинэ кулэ. Нош али ми Никоен шумпотӥськом коми нылпиослэсь финн-угор калыкъёс сярысь тодон-валанзэс но соосын тунсыкъяськемзэс трослы будэтӥм шуыса.