Тӥгырменъёслэн гуръёссы зарни манет кадь сандык пыдсын гинэ-а кыллёзы?

26 шуркынмонэ Кияса ёросысь Выль но Вуж Тӥгырмен гуртъёсын экспедицие потамы, крезьгуро фольклорез гожтон понна.

Та локальной группа туж тунсыко луэ пӧртэм энеро тодосчиослы, малы ке шуоно татын туннэ нуналозь возиськизы вашкала сям-йылолъёс, кырӟанъёс но тодон-валанъёс. Удмурт калык сямъёсты чаклам но утем сяна, соос тодо на матысь гуртъёсысь уно ӟуч, бигер но пор кырӟанъёсты, кудъёссэ уг тодо ини со гуртъёсын.



"Чебер апайёс"

Экспедиция дыръя шараямын вал трос пӧртэм жанръем кырӟанъёс. Туннэ нуналозь та гуртъёсысь удмуртъёс Быдӟым Нуналэ  вӧсь гуръёсты быдэсъяло, солдат пиез лекрут гурен келяло, йыр-пыд сётон гуръёсты кырӟало кулэм муртлы йыр-пыд сётыку но мукет. Озьы ик чузъяськизы та гуртъёсысь удмуртъёслэн ас гуръёссы. Тросэз муртъёс кинъёслэсь кырӟанъёссэ быдэстӥзы удмурт кышноос улэп ӧвӧл ини. Кылсярысь, таӵе ас кырӟанъёс кырӟазы – «Лукерьяпайлэн гурез», «Обранагайлэн гурез», «Буди Оксиньяпайлэн гурез» но мукет.

Кырӟанъёс гожтэмын вал «Чебер апайёс» (Вуж Тӥгырмен) но «Тӥгырмен кенакъёс» (Выль Тӥгырмен) ансамбле ветлӥсь кышноослэсь.

"Ти:гырмен кенакъёс"

Азьпалан малпамын серийной крезьгуро бичетъёс поттыны: приуроченной кырӟанъёсын, неприуроченной кырӟанъёсын но словестной фольклорен (легендаос, визькылъёс, лэчыт кылъёс, выжыкылъёс, мадиськонъёс но мукет).

Та кырӟанъёсты пересьёс сяна тодӥсь ӧвӧл ини, соин но соослэн дунзы зарниен одӥг радын. Ми туж шумпотӥськомы та вашкала кырӟанъёсты гожтыса вуттӥмы шуыса. Котькуд ар улонысь кошко пересьёс, кудъёсыз тодо но утё вал удмурт сямъёсты, кырӟанъёсты, нош соос берын меч ярдур кыле… Малы? Малы ке шуоно егитъёслы али вакытэ вашкала вакытысен люкам, синьысэ бырттылэм азвесь манетъёс кадесь удмурт сямъёс тунсыко уг пото ни. Озьы ке, мар вите милемыз азьпалан? Выжытӥ ӵогем писпу кадь кылён вите-а?