Удмурт "ЛУД" Эстониын вормисьёс пӧлын

Туннэ ветлӥ финн-угор вӧсьлыко интыослы сӥзем ӵошатсконлэн йылпумъян ужрадаз, кытын ортчиз вормисьёсты шараян. Ачим ӧй ке но вормы ӧтемын вал Удмуртиысь Капитонов Владимир Иванович интые кузьымзэ басьтыны. Жаляса верано ачиз лыктыны ӧз быгаты. Кызьы мон тодӥсько, со ужа Удмурт кун университетын Биолого-химический факультетын. Солэн «Луд» туспуктэмез вормиз «Тема Мира» номинациын. Та туспуктэм лэсьтэмын вал Алнаш ёросысь Кузебай гуртын. Озьыен ӟечкыласько туспуктэмлэсь авторзэ но Кузебай гуртын улӥсьёсты! Вераны кулэ, та луд туж тодмо луэ тодосчиос пӧлын. Трос тодосчиос вуылэмын татчы эскерыны но фиксировать карыны татын орчись вӧсьёсты. Кылсярысь, Эстониысь татчы вуылӥз тодосчи-этнолог Аado Lintrop, кудӥз эскериз удмурт осконэз, книга поттӥз но фильм снимать кариз та пумысен.

P.S. Та ужрадын монэн ӵош вал на мукет местной удмуртъёс. Куке возьматӥзы вормисьёслэсь фотооссэс ми кӧня ке паймемын вал – макет урод туспуктэмъёс вылӥ дунъямын вал шуыса. Вераны уг луы ваньмыз урод вал шуыса, но тросэз ярантэмгес вал кадь.

Туж ӝож конечно удмуртъёсмы татын туж алама инициативазэс возьматӥзы, та конкурс сярысь информация интернетын вал ке но. Дырды яке туспуктэмъёсты жаль потизы-а? Одӥг ке но келяны луэ вал шуыса малпасько. Удмуртъёс пӧлысь ӵошатсконэ 2 яке 3 мурт гинэ пыриськемын вал, туспуктэмъёс но чотамон. Татын нош син шоре йӧтӥзы поръёс. Соослэн макемында вал туспуктэмъёссы, ма конкурсын но вормиз пор Сергей Таныгин «Мировой молебен» туспуктэменыз.

Берло верамын вал на поръёслэн но эстонъёслэн вӧсяськон арамаоосы сярысь, кыӵе уж нуиське соосты утён но регистрировать карон пумысен. Нош удмуртъёс татын но бер кунянъёс. Асмелэн уг но синйылто кадь та ужез. Нош со вакытэ ик кӧня асьмелэн сыӵе интыосмы! Валамон христиан оскон кужмо нуэ пропагандазэ но ужзэ тае аналтон пумысен, нош со вакытэ ик со асьме калыклэн историез но вашкала культураез ук. Макем бадӟым фонд ыше! Та бордын тодосчиос гинэ вырыны кулэ ӧвӧл! Малпасько котькуддылэн гурт котырады сыӵе вӧсьлыко интыосты но писпуосты вань.

Тӥни сыӵе огъя малпанъёс но мылкыдъёс вал туннэ ужрад бере.