Таиз гужем
мон понна туууж узыр вал пӧртэм ужрадъёсын. Но тужгес валтӥсез экспедицие
потан. Оген мӧзмыт кадь, ма кинэ ке ӧтьыса ёросысьтымы бай материал, оло, мукет
энерысь тодосчиослы но тунсыко луоз шуыса вазиськи егит удмурт тодосчиосмылы –
Ирина Пчеловодовалы, Татьяна Окуневалы, Денис Корниловлы но Екатерина
Коротаевалы. Озьыен люкаським но кенешим. Ог арня куспын ми кулэ вал Кияса
ёросысьтым вань удмурт гуртъёсты ортчыны. Нош соос огъя 7 – Вуж Тӥгырмен (Калашур),
Виль Тӥгырмен (Дубровский), Уддяди (Карамас-Пельга), Вуж Салья (Старая Салья),
Починка (Верхняя Малая Салья), Неннюк (Нижняя Малая Салья), Куӵос (Кады Салья).
Азьлань вераса, огаз гынэ ӧм вуэ – Починкае.
Озьыен Ижкарысь
ми потӥмы экспедицие шуыса, нош потӥмы ми улонэ…
Нырысь вуимы
Вуж Сальяла. Калык татын котьку пумита тыр ӝӧкен но капчи мылкыдын. Пумиськонмы
но ужмы ортчиз СальяДор агроусадьбаын, со понна тау нимысьтыз Алена Петровалы.
Кулэ вераны, валтӥсь мугмы вал калык сэбедъёсын герӟаськымтэ кырӟанъёсты
гожтыны. Жингрес куараё салья кенакъёс трос час ӵоже кырӟазы быдэс сандык мында
гуръёссэс. Котькудӥз кырӟан герӟаськемын гуртысьтызы адямилэн улонэныз.
Котькудзэ соос шӧдыса кадь кырӟало, куддыр кырӟан висказы вуо кадь пыдло ас
малпанъёсазы. Огез сыӵе кырӟанзы нимаське «Синьтэм Опочлэн гурез». Куке но
гуртазы улэм синьтэм Опоч нимо воргорон. Яратэм со гуртысьтызы чебер нылэз.
Кема возем сюлмаз яратонзэ, нош огпол яратонэз сярысь верам нылмуртлы. Нылаш
сое сереме гынэ уськытэм. Соку чигем солэн сюлмыз, вань мылкыдысьтыз кырӟам та
гурзэ но нюлэскы мыныса кызьпуэ ошиськем.
«Сылӥськод ук тӧдьы кызьпу
Нюлэсэз люгыт карыса.
Мынам но ведь вал туганэ,
Тон кадь чебер, веськырес…»
Калык кылэм та
гурзэ но сюлмаз пыӵам со кырӟан. Тунсыко потӥз на сальяослэн «Кабак шур
дуръёстӥ...» кырӟанзы пумысен ӝожтӥськемзы. Огез кышномурт шуэ: «Басьтӥллям со Ишматоваен
Катковъёс кырӟанмес но, асьсэос шонертэм кырӟало «Аран бырем бере, сизьыметӥ
юозы…» шуыса. Вот ведь-а! Салья калыкмес юисьёсы кельтӥзы. Нош шонер «Аран
бырем бере сизьыметӥ юазы…» шуыса кырӟано». Кырӟанлэсь азьпал сюжетсэ учконо
ке, озьы-а, тазьы-а но, сальяос ӟече уг кылё «Азьтэм шуыса нуытэк но кельтӥзы…».
Калык юмор со! J Нош озьы ке но калык кырзанэз
басьтӥськод ке, умой чаклано текстсэ шуыса малпай мон.
Мукет нуналэ гурын
пыжем табань но шаньги сием бере вуимы Неннюке. Аслам татчы чик ветлэме ӧй на
вал. Соин уг ик тодӥськы вал, кытын клубзы шуыса. Нэнэе улэп дыръяз нулдо шуиз
вал но, ӧз вуы. Та палась уго солэн выжыосыз. Аслым но возьытгес вал кадь, одӥг
ёросын улыса но вуылэмын ӧвӧл на шуыса. Тани вуимы ми клуб азязы, нош милемыз
кырӟаса пумитало ни. Клубе пыриськом, нош клубын тросаз калык. Мон шыпытак
юасько огез кышномуртлэсь марлы сомында калык люкаськемын шуыса, но интыям ик
пуксисько вал ни. Концерт адӟыны шуыса, пе, вуэмын, Николай Анисимовез. Соку
мыным ноку кадь умойтэм ӧз потылы вал, дыр. Трос пол кулэ луиз калыклы
валэктыны мон туннэ эскерись кадь лыктэмын шуыса. Кыл сетоно луиз ини, толалтэ
вуо шуыса. J Мынам синйылтэмея, калык татын востэм,
чебер но туж визьмо. Адӟиське доразы палэнысь калык ӵем уг вуылы шуыса, но
именно таӵеенызы соос тууж кельшизы ваньмылы, тодосчиослы. Трос кылемын на
тодазы вашкала сэбэдъёс. Огез монэ паймытӥз. Юаськон поттӥмы муш утён гур
сярысь. Огез кышномурт тодаз вайиз, гуртазы, пе, муш поттыкузы мушкасьёс
люкасько вал но «Муш поттон гур» кырӟаса потто вылэм умортоосэс муш бакчаосазы.
Кылзӥськыса пайми гурезлы, тууж чебер но поръясь, секыт. Кырӟам бераз, кышномурт
ватсаз на: «Мушлы кырӟаськод-вераськод ке, «ой» шуоно ӧвӧл. Мушлы секыт луэ шуэ
вал мушкась пересь. «Ай», пе, шуоно». Вот таӵе факт йырам чилектэм кадь ортчиз.
Мур малпаськоно ке, зэм но, соослэн пӧртэм пуштроссы. Кыллэн но магической но
психологической воздействиез калык культураын бадӟым инты басьтэ вал шол. Али
вакытэ ни ми вунэтэмын сое.
Та нуналэ ик,
бергес, мынӥмы на мукет гуртэ – Кады Сальяе. Та гурт сярысь мон туж ӧжыт
тодӥсько вал, малы ке шуоно озьы ик вуылэме ӧй вал. Та гурт ёросамы тужгес но
лымшор удмурт гуртэн лыдъяське. Жаляса пусъёно луэ, та гуртысь оригинальной
удмурт калык крезьгурез ӧжытгес люкамы. Тросэз асэстэм но мукет ёросъёсысь ваем
гуръёс. Озьы ке но та гуртын но вал паймоноез но шумпотонэз. Одӥг кышномурт
бызем гуртысьтызы воргоронлы, берло люкиськиллям соос, кышномурт кошкем Иже
улыны. Аръес ортчиллям, нылпиосы бадӟымесь ини, нош соос выльысен
огазеяськиллям. Вот ведь, кызьы но уг берыкты вылэм улон. Та улонзэ верам бере
со шуак кырзаны кутске шудтэм яратон сярысь кырӟан. Кырӟанзэ шуак быдтэ но шуэ:
«А, однако, ӧз воштӥськы ук! Кыӵе вал сыӵе кылиз».
Мукет нуналмы
кутскиз ини Тӥгырмен палъёсын. Нырысь вуимы Вуж Тӥгырменэ. Таиз «Чебер апайёс»
нимо коллективысь кышномуртъёс гань-гань клубын пукыса возьмало вал ини
милемыз. Таосыз но трос бугыръязы крезьгур шыкыссэс но узырмитӥзы асьмелэсь
экспедиционной материалмес. Тунсыко, но татын но Ишматова Т.В. тодазы вайизы.
Огез кышномурт шуэ: «Неправильно кырӟа та кырӟанэз («Шунды потоз шунтоз…»)
Ишматова. Капчи гынэ карыса лэзе. Сюлме уг пыӵа со. Поръёс мукет сяин кырӟало
воксё но». Та кылъёсыз бере кырӟа но паймытэ милемыз. Зэм но мукет сяменгес
чузъяське вылэм. Но татын, конечно, валасько эстрада но фольклор пӧртэмгес
шуыса, но всё-таки. J Огез
туж кырӟась песяйзы вань коллектвазы, быземын со татчы Неннюк палъёсысь. Куримы
кырӟаны исаськон кырӟанъёсты. Со чик но малпаськытэк мытӥз гурзэ, мукетъёсыз
итиськизы.
«Оти лыктэ машина но,
Укноосыз чиляса.
Оти лыкто Тӥгырмен пиос,
Ныр улъёссы чиляса…»
Собере огез
серекъяса йыркуренгес вера: «Нош ачид Тӥгырмен пилы ик бизид!». Кызьы та бере
мынь уд поты!?
Та нуналэ ик
табере вуимы мынам гуртам – Виль Тӥгырменэ. Нуи мон эшъёсме гуртысьтымы калык
сямъёсты утись-чаклась мурт доры – Никонова Мария Павловна доры. Гуртамы сое но,
юртсэ но музей кадь шуо. Зэм но солэн гуртаз ваньмыз ӝикыт но интыяз. Трос
общий тетрадьёс калык кырзанъёсын, кылбуръёсыныз но гуртлэн историеныз. Котьку
сямен со пумита лулысь-сюлмысь. Самоварен чай пуктэ. Но монэ паймытӥз мукетыз.
Мон нокуно солэсь ӧй кылылы вал али сомында гуръёсты! Со 90 пала аресъем
кышномурт чылкыт йырсазьын валэктэ лад-лад но кырӟа сомында тодмотэм гуръёсты. Та
кышномурт бере вуимы на Тоняпай но Очапай доры. Таосыз но паймоно но
синйылтымон кышномуртъёс. Та бызьыса татчы вуэм муртъёс ас вакытазы пелязы
понӥллям гуртысьтымы кырӟась усточиослэсь гуръёссэс. Табере ини со муртъёс улэп
ӧвӧл, нош гуръёссэс соос милемлы соослэн кылъёсынызы ик быдэстӥзы. Со туж дунлыко
маке, куке малпаськод со кырзанъёс ваньмыз ышемын луысалзы ни шуыса. Озьы ик
котькуд со кырӟанъёслэн но азьвыл кырӟасезлэн улонысьтыз люкетэз но
сюлмаськонэз кылемын. Огез кылсярысь, «Обран агайлэн гурез»:
«Кудёкын
но кошкылэмын,
Вордылэм
нылыд-пиед.
Кылдӥськид
ке но уд кылы,
Бӧрдылэм
но куаразэс…».
Берпуметӥез
планмыя вал Уддяди. Гуртэ вуимы гынэ но, учкисько кин ке но пичи гынэ кышномурт
кыштыр гынэ, йӧн-йӧн вамышъёсын, лавка пала дырттэ. Ирина шуэ, Ӝакапай ӧвӧл-а мара
со? Мон сое кутӥсько но вазисько солы. Со берыктӥське но «Ок вуиды-а, мон ӧй
вуы» шуыса лавкае пырэ. Та гуртлэн вашкала но узыр историез сяна крезьгур
шыкысэз но туж паськыт но узыр, ӝынызэ сое тырмытэ Ӝакапай. Та тяп-тяп удмурт
кышномурт аслаз улон философиеныз, опытэныз но чебереныз туж паймытэ но
шумпоттэ. Но со вакытэ ик со сярысь уд вера со огшоры шуыса, «девушка с
характером» шуысалзы ӟучьёс. J Татын
ми гожтӥмы «Инвожо» ансамбльысьтызы кӧня ке лыктэм муртъёсты. Тросгес, конечно,
кырӟазы-веразы Ӝакапай но Вассапай. Со туж капчиен милемлы удмурт, ӟуч, пор но
бигер кылын кырӟанъёсты кырӟаз, нош берло соку ик переводзэ кырӟа «валад-а»
шуыса. Огез кырӟан сярысь Ӝакапай кырӟаз-вераз но котькинлэсь синкылизэ поттӥз
кадь. Граждан ож дыръя одӥг удмурт семьяез кытысь ке но Алнаш, Пурга яке Агрыз
палась раскулачить кариллям но обозэн нуиллям Иже. Пичи нылпиосыз, пе, бӧрдо.
Гужем куазь, пе, вылэм. Уӵыос чирдо, нош кышномурт бӧрдыса кырӟаса буйгатэ,
нылпиоссэ. Собере Лудорвае вуттӥллям соосты, анайзэс мыскылляса виилям, атайзы но бертымтэ ни.
Нылпиос сиротае кылиллям.
«Ой,
эн чырдэ ук, эн чырдэ ук,
Ӵуж уӵыпикайёсы.
Туж
ке гынэ чырдылӥды,
Ой,
ыбозы.
Ой,
эн бӧрдэ ук, эн бӧрдэ ук,
Каръян
нылпикайёсы.
Туж
ке гынэ бӧрыдылӥды,
Сюлэмыды
чигоз…» .
Бӧрдэм сяна
серекъятӥз но милемыз Ӝакапай. Окунева Танямы удмурт сюанэз эскере бере,
кутскиз сюан сярысь юаськыны. Ӝакапаен Вассапай таӵе факт веразы. Виль кенэз,
пе, нырысь турнаны потэм беразы вуэн пылатъяло, шуре кушто вылэм. Со сяна пинял
кызьпуез ныкыртыса кызьпу йылэ думыло но лэзё, пе, вылэм. Куке син шоры сыӵе
суред пуксе кышкыт но серем но кадь. Но мукет ласянь ке малпаськоно, татын кыӵе
ке но вашкала подтекстэз вань.
Тини озьы
вакчияк ми потамы улонэ. Зэм но озьы, малы ке шуоно калыке потыса
тодматскиськод котькудӥзлэн улонысьтыз адӟонэныз. Со калык, кин доры вуылӥм,
туж сюлме пырымон но зэмос удмурт. Юзмыт ошмесысь кӧт тырымон ву юэм кадь потӥ
мон та экспедиция бере. Улон но дыр татын мукет сямен мынэ, соин, оло, котырысь
пространство но мукет потэ. Куддыръя огвакыт вашкала вакытэ вуэм кадь потоно. Удмурт
улонэ, удмурт калык гуртэ потаса сое чакласькод но эскериськод ке, ӟечгес
валано макем тодмотэм вылэм на ас калыкед, яке макем синтэмесь но пельтэмесь
вылӥськеммы асьмеос. Ӝож усе сюлэме та традиционной сознаниен улӥсь поколение
берпуметӥез шуыса, ӝож ваньмыз та книгаосы, аудиозаписьёсы но фильмъёсы гынэ
кылё на шуыса. Но таиз но шумпоттэ ми вуттӥмы на со поколениез адӟыса, со
материалэз гожтыса. Азьпалан малпамын та кырӟанъёсты бадӟым ужен поттыны «Необрядовый
музыкальный фольклор Киясовского района» нимын.
Озьы потамы ми
улонэ…
